Turmush — «Мекендештер» рубрикасынын кезектеги каарманы — үй-бүлөсү менен Японияда жашап, билим алып жаткан Ысык-Көл облусунун Түп районуна караштуу Михайловка айылынын тургуну Жамила Токторбай кызы. Ал Turmush басылмасынын кабарчысы менен болгон маегинде Японияга кантип барып калганын айтып берди.
Ал учурда Япониядагы Цукуба университетинде билим алууда. 2 жылдык магистратураны аяктоо үчүн мамлекеттик программага катышып, үй-бүлөсү менен бирге Японияга барган.
Жамила Токторбай кызы 1991-жылы Ош облусунун Алай районунда жарык дүйнөгө келген.
«Кара-Суу районунун Талдык айылында мектеп босогосун аттап, кийин Бишкектен уланттым. 9-классты аяктагандан кийин кыргыз-түрк кыздар кесиптик лицейиндеги компьютердик бөлүмдү бүтүрдүм. Андан соң Кыргыз мамлекеттик геология, тоо кен жана табийгый ресурстарды пайдалануу университетинде окуп, инженер-геолог квалификациясына ээ болдум. Студент кезде кошумча Кыргыз-япон адам ресурстарын өнүктүрүү борборунун 4 жылдык курсуна катталып, кечкисин билим алып, япон тилинин 3-деңгээлин өздөштүрдүм.
Жалпысынан окуу жайды 2014-жылы аяктап, эң алгачкы иш тажрыйбамды ушул эле жылдын ноябрь айында Жаратылыш ресурстары министрлигинде геолог болуп баштадым. Андан чоң "Кыргыз алтын "ААКта геолог болдум. Кийин турмуш жолуна аттанып, айыл аймакта айыл өкмөт башчысынын орун басары, жооптуу катчылыкка ишке орноштум», - деди ал.
Ж.Токторбай кызын жолдошу менен баш кошуп, айыл жергесинде жашап жатканы кубандырат. Ал үй-бүлөгө карьера тоскоолдук алып келбегенин кошумчалады.
«Өмүрлүк жолдошум экөөбүз мен студент кезде геологиялык тажрыйба өтөп жатканда таанышкан элек. Ошол кезде ал кызматкер болчу. Экөөбүз 2015-жылы баш кошуп, 3 жыл борбор калаада жашап, 2018-жылы Түптүн Михайловка айылына — ата конушка келдик. Жолдошум үйдүн жалгыз уулу болгондуктан айылга келип жашоо чечимине дароо эле макул болдум. Себеби жан дүйнөм жаратылышка жакын болгондуктан айыл чарба, мал чарба, табиятка суктанып, тез эле көнүп кеттим. Бул мезгилден тарта айыл өкмөткө жооптуу катчы, айыл өкмөт башчынын орун басары болуп эмгектенип келе жатам. Үй-бүлөдө эки уул, бир кыздуу болуп, ата-энелик тарбия берип, милдетибизди аткарып келе жатабыз», - деди ал.
Алган билими 10 жылдан кийин жемишин бергенин айткан каарманыбыз учурда Жапон өлкөсүндө кошумча билим алып, тажрыйба топтоодо. Ал чет элдин маданиятына үй-бүлөсү менен чогуу аралашып, жашап жатканын билдирди.
«2025-жылы мамлекеттик JDS программасын угуп, атайын сынакка катышууну колго алдым. Сынак тапшырууда англис тилин да билүү зарыл эле. Ошентип бир катар баскычтан өтүп, өзүмдүн буга чейинки алган билимимдин натыйжасында степендиялык окууга өтүп кеттим.
Эң алгач Япониянын Цукуба шаарына август айында келип, окуу жайга жайгаштым. Ал эми үч айдан кийин балдарымды алып жолдошум аркамдан келди. Ошентип азыркы тапта балдарым мектепте билим алып, жолдошум бул жакта эмгектенип жатат.
Жапон элинин маданияты үй-бүлөмдү таң калдырды. Мектептен тамак-аш ичкен соң артынан өздөрү жууп-тазалап, сүт ичкен картон кагазды да жууп-тазалап, кесип, кайра иштетүүгө жөнөтүшөт экен. Бул аракет өсүп келе жаткан жаш муундарды эмгекчилдикке үйрөтөт деп баа бердим. Ал эми чоң адамдар жарык түшкөндөн баштап жумуш кылып, абдан эмгектенишет экен. Кээ бир учурда станцияда же эс алуу жайларда эл көп болсо, эки саатка чейин кезек туруп күтүү маданияты да жогору.
Бул программа менен келгениме сыймыктанам. Ошол эле учурда жоопкерчиликтүү, себеби кийин мекенге кайтканда өзүмдүн кесибиме байланыштуу тажрыйбамды жайылтам. Эки жылдык магистратуралык илим технологияны изилдөө, айлана-чөйрөнү коргоого багытталат. Өзүм ай сайын миң доллар стипендия алам. Балдарым мамлекеттен жөлөк пул алып, айтор жашообузга жетип жатат.
Шаар ичинде велосипед менен жүрүүнү жактырабыз. Эс алуу күндөрү үй-бүлөбүз менен сейилдөөнү жактырабыз. Албетте, ошол эле маалда маданий иш-чараларга да катышып жатабыз. Жакында эле Тайвань өлкөсүнө барып келдим. Тамак-ашка көнүп калдык, кыргыз ашканадан сырткары япон ашканасын да өздөштүрүп жатам. Дал ушул мезгилде сакура гүлү ачып, кооздугу көз жоосун алат экен. Ушундай мүмкүнчүлүктү колдоп келет жаткан үй-бүлөмө, жолдошума, ата-энеме, кесиптештериме терең ыраазычылык билдирем», - деп сөзүн жыйынтыктады.