Turmush — Кыргызстандын Эгемендүүлүгүнүн 34 жылдыгына карата Түп районунун Каркыра айыл аймагында 100 орундуу жаңы мектеп жана 24 жумуш ордун түзгөн бетон заводу пайдаланууга берилди. Салтанаттуу ачылыш аземи 29-августта президент Садыр Жапаровдун онлайн катышуусунда өтүп, тасма кесилди.
Жергиликтүүлөр белгилешкендей, чек арадагы бул айыл үчүн мектептин ачылышы тарыхый күн болуп калды.
Жаңы мектеп
Ж.Асылбаев атындагы мектеп башталгыч деңгээлде гана билим берип келген. Өткөн окуу жылында 25 окуучу окуп, 3 мугалим эмгектенген. Эми жаңы имараттын ачылышы менен мектеп 12 жылдык толук билим берүүчү окуу жайга айланат.
Мектеп 2023-жылы курула баштап, жалпы наркы 80 млн 11 миң 770 сомду түзгөн. Эки кабаттуу, заманбап шарттагы билим уясына спорт зал, ашкана, китепкана, предметтик кабинеттер, жуунучу жайлар жана компьютердик бөлмөлөр орнотулду. Жылуулук тутуму от жагуу жолу менен камсыздалат. Мектепке керектүү бардык жабдуулар алынып, ар бир класска үн динамикасы жана видео көзөмөл орнотулган.
Мугалим Чолпон Туратованын айтымында, мурдагы эски имаратта сабак өтүү кыйынчылыктарды жаратса, эми жаңы мектеп мугалимдер менен окуучуларга дем берген шарт түздү.
Окуу жайдын директору Урмат Алиевдин маалыматына ылайык, 2025–2026-окуу жылында мектепке 70ке жакын бала кабыл алынат.
Өндүрүш ишканалары
Кең-Суу айылында «Глобал бетон» заводу ишке берилди. Анын курулушу 2024-жылы башталып, 2 млн АКШ доллары инвестиция салынган. Завод саатына 60 куб бетон жана 110–130 тонна таш майдалоого жөндөмдүү. Учурда 24 жумушчу орун түзүлүп, келечекте 35–40 адам туруктуу жумуш менен камсыз болушу күтүлүүдө.
Мындан тышкары, Талды-Суу айылында Түп районун өнүктүрүү фондунун эсебинен 2 млн 300 миң сомго муниципалдык кичи ишкана ачылып, полистирол блок жана пескоблок чыгарылууда. Бул ишканада 10го жакын адам ишке орноштурулду.
Ошондой эле кыргыз-азербайжан өнүктүрүү фондунун колдоосу менен Чымынды-Сай жайлоосуна кичи ГЭС курулушу башталды. Каркыра айылына дагы бир кичи ГЭС куруу пландалууда.
Түп районунда өндүрүш тармагы өнүктүрүлүп жатканын Түп райондук мамлекеттик администрациясынын башчысы—аким Тимур Мадяров билдирди.
Анын айтымында, акыркы мезгилдерде Кыргызстанда, анын ичинде Ысык-Көл жана Түп районунда да курулуштардын көлөмү көбөйгөндүктөн, район боюнча өндүрүш тармагын колго алуу зарыл болуп жатат.
«Кең-Суу айылындагы темир-бетон заводу инвесторлордун жардамы менен ишке берилди. Бул жерде саатына 48 куб метр бетон өндүрүлөт. Ошондой эле Талды-Суу айылындагы курулуш материалдарын чыгаруучу кичи ишкана кеңейтилип жатат. Бул үчүн кошумча каражат бөлүнүп, шакекче жана бордюр чыгаруучу жабдыктар сатып алынууда.
Мындан тышкары, быйыл эң ири долбоор катары совет мезгилинен калган Күрмөнтү цемент заводу каралууда. Учурда инвестор тартылып, сметалык жана долбоордук документтер даярдалууда. Бул ири завод 2026-жылдын аягына чейин ишке берилет», — деди аким.
Каркыра айыл өкмөтүнүн башчысы Рустам Черикбаевдин айтымында, негизги багыт — калктын жашоо-турмушун жакшыртуу, ыңгайлуу шарттарды түзүү жана жумуш орундарын көбөйтүү.
«Эгемендүүлүк майрамына карата эң алыскы, катаал шарттагы Каркыра айылында элдин көптөн күткөн тилеги ишке ашты. Жаңы мектеп курулуп бүтүп, жергиликтүүлөр үчүн тарыхый кадам болду. Мындан ары дагы өндүрүш тармагына көңүл буруп, жаңы жумуш орундарын түзүү багытында иштерди жүргүзөбүз», — деди ал.