Бөлүмдөр
Ишемби, 21-сентябрь
Ысык-Көл облусуТүп району 22.08.2019 10:18 Жаңыланды: 01.09.2019 16:01

Сүрөт — Кыргыз үй-бүлөгө келин болуп, бак тапкан балкар кызы Х.Урмамбетова

Turmush -  Кыргыз үй-бүлөгө келин болгон балкар кызы Хамрият Урмамбетова учурда Ысык-Көл облусунун Түп районунун Кичи-Өрүктү айылында жашайт. Аймактык кабарчы аны менен таанышты.

Өзүнүн айтымында, ал 1962-жылы 19 жашында ушул айылга келин болуп келген.

«Ата-энем Кабардино-Балкариядан 1930-жылдары Кыргызстанга келип жашап калышкан экен. Кыргыз улан-кыздардын арасында өстүм. Өңүм башка болгону менен кыргыздын эле кызымын. Чоңоюп, бой жеткенде болочок жолдошум менен сүйлөшүп жүрүп, турмушка чыктым. Башында баары таң калып, балкар келин деп жүрүштү. Азыр балпайган байбиче болдум. 5 кызым, 1 уулум, 24 неберем бар», - дейт 75 жаштагы Хамрият Урмамбетова.

Анын айтымында, бир кызы балкар жигитке турмушка чыкса, уулу казак кызына үйлөнгөн.

«Көп улуттуу үй-бүлөбүз. Балдарыма ыраазымын, бири да мени капа кылган жок, көз жашымды төккөн жок. Колдон-буттан алып, мага жөлөк болуп келгенине ыраазымын. Светлана деген жалгыз келиним бар, ал казак кызы, мага 5 небере белек кылды. Өтө оор басырыктуу, сыйчыл. Уулум экөө үй куруп, оокатын кылып жатышат», - деп кошумчалады.

Үч улуттун өкүлү жашаган үй-бүлөдө кыргыздын каада-салтын карманышат. Хамрият Урмамбетованын айтымында, алар кыргыздын салты менен уулун үйлөнтүп, кыздарын узатышкан.

«Үйдө ынтымак болсо, кайсы улуттан экениң деле маанилүү эмес, эң башкысы сый мамиле жана бири-бирин колдоо керек», - дейт ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×