Бөлүмдөр
Ишемби, 21-сентябрь
Ысык-Көл облусуТоң району 16.08.2019 15:45 Жаңыланды: 16.08.2019 18:31 На русском

«Жашоом жомоктогудай өзгөрдү»: Германияга конокко барган бойдон калып калган кыргыз кызынын баяны

Turmush -  «Мекендештер» рубрикасынын кезектеги каарманы — Ысык-Көл облусунун Тоң районунун Бөкөнбаев айылында туулган 34 жаштагы Гүлибарчын Курманбаева. Учурда ал Германиянын Падерборн шаарында жашайт. Turmush басылмасынын кабарчысы мекендешибиз менен таанышты.

Өзүнүн айтымында, ал К.И.Скрябин атындагы Кыргыз улуттук агрардык университетин аяктаган.

«Германияга 2018-жылдын 30-августунда конок болуп келгем. Бактыма жараша кондитердин окуусуна кабыл алуу болуп жатканын угуп, калып калдым. Азыр үйрөтүүчү курста окуп жатам. Тескерисинче алар мага айына 400 евродон төлөшөт. Үч жыл окуп, андан кийин кондитер болуп иштеп баштайм. Маяна мен билгенден 1000 евродон жогору. Ал эми тажрыйбасы барлар андан дагы көп алышат.

Чындыгында бул жакта элдин жашоо шарты жакшы, абасы таза. Түтүн, газ чыккан унааларды көргөн жокмун. Бай адамдар деле кичинекей унаа айдап, чакан үйдө жашап, саякатка көбүрөөк чыкканга аракет кылышат. Бул жакта пенсионерлерге пенсия 800 евродон жогору төлөнөт экен.

Байкашымча эли президенттери жөнүндө сөз деле кылышпайт. Эли дайыма күлүп жүрөт. Дүкөндө 45-50 жаштагы адамдар деле иштешет. Адамдын жашына карата чектөө жок. Туура тамактануу, чуркоо, шайтан араба тебүү адатка айланган. Жолдо унаа айдоо маданияты жогору. Эли сылык-сыпаа мамиле кылышат. Бир жолу соода борборуна барып, бир эле шоколад алып кассада тургам. Алдымда көп азык-түлүк алган адамдар кезек күтүп турушкан. Бир маалда баары мени чакырып, биринчи өткөрүп жиберишти. Өтө жагымдуу болду», - деди ал.

Ошондой эле ал кызыктуу окуяларды эскерди.

«Бир күнү немистер үйгө конокко келишмей болду. Ага чейин мен улуттук бешбармак тамагы тууралуу айтып берген элем. Конокторду күтүп, уйдун этин бышырып жаткам. Бир маалда туз салайын деп, анын ордуна адашып соода салып алдым. Тамакка салсам эле көбүк чыкты. Эми бешбармак эмне болот деп аябай кайгырдым. Кайра туз таап салдым. Тескерисинче эт жумшак жана дамдуу болуп бышыптыр. Конокторум дагы абдан ыраазы болуп кетишти», - дейт Гүлибарчын Курманбаева.

Ал болочок жолдошу менен таанышкандан кийин жашоосу толугу менен өзгөргөнүн айтат.

«Мен 23 жашымда ойлонбой эле турмушка чыгып, уулдуу болгондон кийин жолдошум экөөбүз ажыраштык. Башымдан оор күндөр өттү. Азыр бардык кыйынчылыктар артта калды. Менин Германияга келишиме болочок жолдошум себепкер болду. Ал — Кеңеш Аманкулов 26 жыл мурун эле Германиянын жарандыгын алган.

Экөөбүз Бишкек шаарында сүрөт көргөзмөдөн таанышканбыз. Ал мага моралдык жана материалдык жардам көрсөтүп турат. Аны менен таанышкандан кийин жашоом жомоктогудай өзгөрдү. Ал менден 20 жаш улуу болсо дагы дайыма менин оюм менен болот. Эми мен дагы бул өлкөнүн жарандыгын алып, уулумду ушул жерден окутууну жана ушул жерде жашап калууну пландап жатам», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×