Turmush — Ысык-Көл райондук мамлекеттик администрациясынын башчысы—аким Жапарбек Ормонов 2025-жылы Ысык-Көл районунда социалдык-экономикалык жана инфраструктуралык багытта ири иштер аткарылгынан билдирди.
Анын айтымында, туризмдин чордону саналган Чолпон-Ата шаарында жол оңдоо иштери эрте жаздан тарта башталган. Узак жылдар бою аң-чөнөккө толуп, шаардын көркүн бузуп келген негизги Совет көчөсү толугу менен жаңыланып, анын 1 чакырым аралыгына жаңы асфальт төшөлдү.
Мындан тышкары, шаар ичиндеги жолдор оңдолуп, жөө жүрүүчүлөр үчүн заманбап тротуарлар салынды. Көл жээгине алып баруучу кичи көчөлөр да асфальтталып, шаар тургундарына жана эс алуучуларга ыңгайлуу шарттар түзүлдү.
Унаа жолдору менен катар веложолдун курулушу да көңүл сыртында калган жок. Чолпон-Ата шаарында ишке ашкан эң ийгиликтүү долбоорлордун бири — веложолдун курулушу болду. Жыл сайын Ысык-Көлдүн жээгинде машыгып жүргөн чет элдик спортчулар аймактын мурдагы жана азыркы абалын асман менен жердей айырмаланат деп баалашууда.
Кыштын чилдесине карабай, бул жерде велосипед тепкендер жана жеңил атлетика менен машыккандар арбын. Веложолдун жалпы узундугу 22 чакырымды түзөт. Ал Чолпон-Ата шаарынан башталып, Корумду айылына чейин созулат.
Туризм тармагында да олуттуу жылыштар болду. Райондогу муниципалдык пляждардагы башаламандык жоюлуп, утур-тетир жайгашкан соода күркөлөрү толугу менен алынды. Алардын ордуна эс алуучулар үчүн акысыз күн чатырлар, отургучтар, балдарга арналган оюн аянтчалары жана кийинүү жайлары орнотулду. Жыйынтыгында «Золотые пески», «Борбор» жана «Кейсар» муниципалдык пляждары таанылгыс болуп өзгөрдү.
Өндүрүш тармагында да бир катар маанилүү долбоорлор ишке ашырыла баштады. Алардын бири — Тору-Айгыр айылында курулуп жаткан күн электр станциясы. 1900 МВт кубаттуулуктагы бул станция облус тарыхындагы ири долбоорлордун бири болуп саналат. Жалпы наркы 270 миллион АКШ долларын түзөт. Учурда курулуш иштери кызуу жүрүп, станциянын биринчи фазасын 2026-жылдын аягында ишке киргизүү мерчемделүүдө.
Мындан тышкары, быйыл райондун аймагында эки кыш чыгаруучу заводдун жана чакан ГЭСтин курулушу башталды. Бул объекттер райондун экономикасын өнүктүрүүгө олуттуу салым кошмокчу.
Турак-жай маселеси да системалуу түрдө чечиле баштады. Учурда Чолпон-Ата шаарында мамлекеттик ипотекалык турак жайлардын курулушу жүрүп жатат. 35 гектар жер аянтына 68 блоктон турган үйлөр салынмакчы. Үйлѳрдүн алгачкылары 2026-жылдын июнь айында пайдаланууга бериле баштайт.
Долбоорго ылайык, жаңы кичирайондо поликлиника, 1000 орундуу мектеп жана 240 орундуу үч бала бакча курулат. Натыйжада буга чейин кароосуз жаткан аймак жакынкы эки жылда заманбап кичирайонго айланмакчы.
Социалдык тармак да көңүл сыртында калган жок. Райондун карамагына жалпы 30 айыл кирет. Анын ичинен 10 айылда мектептер жана бала бакчалар толугу менен жаңыланды. Бул акыркы жылдары билим берүү тармагында болуп көрбөгөндөй ийгиликтерге жетишилгенин айгинелейт.
Экология маселеси да артыкчылыктуу багыттардын бири болду. Миллиондогон туристтер келген аймакта айлана-чөйрөнү коргоо максатында заманбап саркынды сууларды тазалоочу система курулууда. Долбоордун жалпы наркы 65 миллион АКШ долларын түзүп, ал Азия өнүктүрүү банкы тарабынан каржыланууда.
Аталган иштер 2025-жылы райондо ишке ашкан жүздөн ашык долбоорлордун ичиндеги эң ирилеринин катарына кирет. Мындан тышкары, ФАПтардын курулушу, айылдарга таза суу тартуу, ички жолдорду асфальттоо сыяктуу иштер да үзгүлтүксүз улантылды.
Белгилей кетсек, 2025-жылы Ысык-Көл районуна эки миллионго жакын турист келген. Райондун жылдык бюджети 1 миллиард 800 миллион сомду түздү. Район жетекчилиги 2026-жылга карата да конкреттүү пландар коюлуп, туристтик аймактын дараметин арттыруу багытындагы иштер мындан ары да улантыларын белгилейт.