Turmush — Түп районунун Каркыра айыл аймагынын жалпы жамааты жайкы туризмди ийгиликтүү өткөрүү максатында «Таза Каркыра» аттуу акцияны уюштурду.
Иш-чаранын негизги максаты — Каркыра жайлоосуна келген коноктор үчүн жагымдуу шарт түзүү, айлана-чөйрөнү таза сактоо жана жаратылышка аяр мамиле кылууга үндөө.
Акциянын алкагында айыл өкмөтүнүн аппараты, социалдык, маданий жана башка бөлүмдөр активдүү катышып, 2 тоннага жакын таштанды чогултулду.
Маалыматка ылайык, 2025-жылдын эсеби боюнча Каркырада 20дан ашык жеңил конструкциядагы конок үйлөр (боз үйлөр жана башка убактылуу турак жайлар) иштеп жатат. Алар чет элдик туристтерди жана Кыргызстандын жети дубанынан келген конокторду кабыл алууда. Ошондой эле күндүн ысык мезгилинде коомдук кичи автобустар жана жеке унаалар менен келгендердин саны да арбын.
Каркыра айыл өкмөтүнүн башчысы Рустам Черикбаев билдиргендей, акыркы 2 жыл ичинде Каркыра жайлоосунда чоң өзгөрүүлөр орун алды.
«Жол оңолсо, иш оңолот демекчи, эл аралык Түп–Кеген жолунун курулушу менен катар Чаар-Кудукка чейинки 13 чакырым жол асфальтталып бүттү. Бул жылы Туз жайлоосуна кеткен кошумча 3,5 чакырым жол Транспорт министрлиги тарабынан асфальттала турган болду. Мындан тышкары түнкү жарыктандыруу орнотулду. Ошондой эле мамлекеттик ОСАГО уюму, акча алмаштыруучу жай да жайлоодо иштеп жатат. Чек арадан кирген туристтер үчүн да шарттар жакшырды. Быйыл туристтердин агымы өзгөчө көп болууда, ошол себептүү айыл өкмөт жамааты тазалык акциясын өткөрүү демилгесин көтөрүп чыкты. Бул аракет аркылуу конокторго таза жана жагымдуу маанай тартуулоону көздөп жатабыз», — деди Р.Черикбаев.
Бүгүнкү күндө Каркыра жайлоосунда таштанды жумасына эки жолу чогултулуп, атайын унаа менен чыгарылат. Ар бир конок өз айланасын таза кармоого милдеттүү экенин айыл өкмөт башчысынын орун басары Нуржан Жасолбекова белгиледи.
«Табиятты көздүн карегиндей сактап, келечек муундарга өткөрүп берүү биздин жарандык милдетибиз. Айыл өкмөттүн бардык кызматкерлери бул акцияны колдоп, ишембиликке активдүү катышып жатышат. Мындан ары да мындай демилгелер улантылат. Ошол эле учурда биз жергиликтүү конок үйлөрдүн ээлерине жана эс алуучуларга тазалыкты сактоо боюнча түшүндүрүү иштерин жүргүзүп жатабыз. Алар биздин сунушту түшүнүү менен кабыл алып жатышат. Демек, бул аракетибиз башкаларга да дем берет деген ишенимдебиз», — деди Н.Жасолбекова.
Каркыра жайлоосу — Кыргызстандын эң кооз, табияты таза жана тарыхы бай жайлоолорунун бири. Ал Ысык-Көл менен Нарын облустарынын ортосунда жайгашып, бийик тоолору, таза абасы жана бай экосистемасы менен айырмаланат. Бул аймак туризмди өнүктүрүүдө чоң мүмкүнчүлүктөрдү ачат.
Туризмди туруктуу жана экологиялык негизде өнүктүрүүдө жергиликтүү жамааттардын активдүүлүгү, жаратылышка болгон жоопкерчилиги жана ыктыярчылык маанилүү роль ойнойт. Бул сыяктуу ишембиликте коомдук аракеттер туризмди сапаттуу жана туруктуу жолго салууга өбөлгө түзөт.