Turmush — Ысык-Көл облусунун Ак-Суу районуна караштуу Кереге-Таш айылынын тургуну Шаршакан Талканчиева ардактуу эс алууга чыгып, улуттук баш кийим жасоо менен алектенип жатат. Уз айым менен Turmush басылмасынын кабарчысы маектешти.
Шаршакан Талканчиева көп жыл бою эсепчи болуп иштеген.
«Кесибим боюнча эсепчимин. Отрадное айыл аймагында жана №11 жол тейлөө ишканасында бухгалтер болуп иштедим. Ардактуу эс алууга чыгып, бош учурумда «Шайыр апалар» тобунда ырдап калдым. Ал жакта улуттук кийимдер менен ырдашат. Мен элечегимди 5000 сомго сатып алдым. Мен өңдүү апалар да элечекке муктаж экенин билип, өзүмдүн элечегимди жандырып, кайра ороп жатып үйрөндүм десем болот», - дейт ал.
Каарманыбыз улуттук баш кийимдердин бир нече түрүн жасоодо.
«Элечекти 3, 5, 10 метр кездеме менен жасайм. Илгеркидей 17 метр деген жок. Чакан, жеңил болсун деп сурашат. «Кыдыр Аке урпактары», «Ак-Суу уздары» кол өнөрчүлөр тайпасында да мүчөмүн. Ал жакта уздар менен тажыйырба алмашып, жасаган ишибизди көргөзүп, шыктанып турабыз. Менин жасаган эмгегимди шайыр апалар, 50-60-70 жашка чыгып жаткан байбичелер сатып алышат. Бир элечекти 2500-5000 сомго чейин сатам. Кыздарга кептакыя жана үкү топу жасайм. Мурда шуру тагылса, азыр даяр оюулар бар, ошону тигип, шөкөттөйм. Бош учурда жасаган ишимден эргүү алуу менен кошумча каражат да таап алам», - деди Шаршакан Талканчиева.
Каарманыбыздын айтымында, изденүүнү жакшы көрөт.
«Дайыма иштеп жүргөн адам отура албайт экен. Өзүм изденүүнү жакшы көрөм. Жаңы нерсе үйрөнүп, аны жасап көргөн жагат. Кол өнөрчүлүктөн сырткары самын жасоо боюнча да окудум. Азыр табыйгый таза самындарды, тери көйгөйлөрү барларга да самын жасап жатам. Дарыканадан чөптөрдү алып, алардын тундурмасын самынга кошом. Үй-бүлөбүз менен колдонобуз. «Бизге да жасап бериңиз» деген жакындарым да бар. Аларды кубандырып, билгенимди жасап берип жатам», - дейт Талканчиева.
