Turmush — Ысык-Көл облусунун Ак-Суу районуна караштуу Кайырма-Арык айылынын 42 жаштагы тургуну Даражан Конокбаева үй-бүлөсү менен тигүү тармагында алектенет. Ал ишкерликти кантип баштап калганын аймактык кабарчыга айтып берди.
«Мен ар бир айым өңдүү эле үйдө ар нерселерди тигип коёт элем. Коронавирус пандемиясы башталып, "беткап кийгиле деп" калышты. 2 балама беткап тигип бердим. Ошол кезде абысыным мектепте мугалим болуп иштечү. Ал мага “кынаптап, сонун тигиптирсиң, мектептегилер сурап жатат, тигип берчи”деп калды. Анан күндө 50-100 даана беткап тигип берип жүрдүм, абысыным сатып берди. Анан бири-биринен угуп, телефон чалып, буюртма бере башташты. Өзүм Караколго алып келип сатып жаттым. Анан материал алганы барып, шейшеп тигип көрүүнү ойлондум. Алгач тиккен шейшептерди туугандарга саттым. Ошентип, менин үй-бүлөлүк кирешем артып баштады», - дейт ал.
Анын айтымында, балалык кыялы орундалып жатат.
«Бала кезимде тикмечи болууну кыялданчумун. Кийин кесип тандоого келгенде медайым болууну чечкем. Бирок шартка байланыштуу мугалимдик кесипти окудум. Турмушка чыгып, кесип алып иштебесем да өз кыялымды орундатууну каалачумун. Мынтип балалык кыялым болгон тикмечилик менен алектенип калдым. Учурда кызым экөөбүз шейшеп бычабыз, мен тигем, жолдошум кнопка басат», - дейт ал.
Каарманыбыздын тиккен шейшептери облуста брентке айланды.
«Ушул ишти баштап жатканда жолдошум бир торпок сатып, акчасына шейшеп алгам. Торпок акталды деп күлүп калам. Алгач билбей түлөп кете турган шейшеп сатып алып, кардарларым нааразы болгон. Кийин сапатына карап алып калдым. 100 миңдеп карыз болуп алып тигем. Сатыктагы баасы базардыкындай эле. Бир жумада 20 даана шейшеп тигем. Биринен бири угуп эле чала беришет. Айымдарга ыңгайлуу болуш үчүн онлайн тайпа түзүп, "шейшеп касса" деп баштап алгам. 300-500 сомдон касса ойношуп, учуру келгенде шейшеп алышат. Төлөп отуруп, кезеги келгенде бекер алгандай сүйүнүп калышат. Алардын ыраазычылыгы мага стимул берет. Азыр мен тиккен шейшептер Бишкекке чейин кетип жатат», - дейт ал.
Даражан Конокбаева 2 баланын энеси.
