Turmush — Ысык-Көл районунун Бостери айылынын 32 жаштагы тургуну Мирлан Касымбеков асыл тукум койлорду багат. Аны менен аймакты кабарчы маек курду.
«Асыл тукум койлорду багып келе жатканыбызга 20 жылдан ашты. Бул койлордун башы чоң атабыздан калган. Атабыз Кеңешбай чоң кара койлорду бакчу. Кийинчерээк биз базарлардан алып келип, башка тукумдагы койлорду кошуп көбөйттүк. Алгач кочкорду табууда бир топ кыйынчылыктар жаралды. Анда азыркыдай интернет аркылуу кой сатуу деген түшүнүк жок. Кочкорду көрүү үчүн үйүнө чейин барып, анан соодалашчы элек. Айрым учурда бир топ жол жүрүп барсаң, ээси үйүндө жок же сатылып кеткен болот.
Азыркы тапта эт багыттындагы койлорду багып жатабыз. Жөнөкөй койлорго караганда кыйла эле салмактуу. Козулары 25тен 50 килограммга чейин эт берет. Ошондой эле туулары менен бат тыныйт. Мелдешке катышкан кочкордун туулган козуларынын салмагы 11 килограммга чейин жеткени болгон. Койдун 80 пайызы жайыт менен эле багылат. Январь айынан тарта чөп, жем бере баштайбыз», - деди ал.
Анын айтымында, койдо берекке бар.
«Ар кандай мелдештерде олжолуу орундарды алып жүргөн кочкорум бар. Учурда 3 жашта, аты Ала-Тоо. 2022-жылы 10 сентябрда асыл тукум «Арашан» породасындагы койлор арасындагы көргөзмөдө 1-орунду ээлеген. Боюнун узундугу 1 метр 7 сантиметр, салмагы 161 килограммды түзөт. Дал ушул кочкордун козуларын көргөзмөдө 85 миң сомдон сураганда, бербей койгом. Бүгүнкү күнгө чейин Ала-Тоонун козуларын сата элекмин. Буга чейин эң кымбат саткан коюбузду бир жылкыга алмашканбыз. Орто эсеп менен алганда 80 миң сом. Кой багуу менен алектенгендерге айтарым, санына эмес сапатына карап, асыл тукум койлорду баккыла. Кой көбөйө берет экен, анда берекке бар.
Үй-бүлөдө 6 бир тууганбыз, 3 уул жана 3 кыз. Ата-энем пенсия курактагы адамдар, эжелерим турмуш жолуна аттанып кетишкен. Байкем экөөбүз мал-жандыктарды карайбыз. Ал эми иним жогорку окуу жайын аяктап, учурда банкта иштеп жатат. Мен үй-бүлөлүүмүн, 1 кыз жана 1 уулум бар», - деди ал.
