Бөлүмдөр
Жекшемби, 8-декабрь
Ысык-Көл облусуТоң району 29.11.2019 08:25

Жаш талант: Чымыны бар Бекзаттын чыгармачылыгы

Turmush -  Тоң районунун Тоң айылынын 18 жаштагы тургуну Бекзат Асанбеков 2 жылдан бери ыр жазат. Өзүнүн айтымында, ал Тоң айылында Азис Салиев атындагы орто мектепте 11-класста окуйт.

«Ыр жазып баштаганыма 2 жылдай болду. Көбүнчө лирикалык жанрга басым кылам. "Баланы ыйлаак кылган шоколад, акынды акын кылган махабат" дегендей, калем кармашыма сүйүү себеп болду. Көбүнчө жан дүйнөм бурганактанган учурда илхом келет. Көп эле ыр жаздым, көңүлүмө жакпай калгандарын тытып салган учурлар болду. Ырларым көбүнчө сүйүү, ата-эне жана жашоо жөнүндө», - дейт Бекзат Асанбеков.

Ал ыр жазуу өнөрү аркылуу түрдүү иш-чараларга катышып келет.

«Былтыр "Поэзия кечеси" аттуу иш-чараны мектеп жамааты менен өткөрдүк. Ошондой эле олимпиадаларда дил баяндарды ыр түрүндө жазып, байгелүү орундарга илинип жүрдүм. Жакында менин кээ бир ырларым "Тандалма ырлар" аттуу ыр жыйнак китебинен орун алганы жатат. Ага белгилүү акындардын ырлары дагы камтылат.

Бош убактымда спорт менен машыгам. Китеп окуйм. Акыркы жолу Жек Лондондун «Ак азуу» повестин окудум. Келечекте мекениме кереги жараган инсандардын катарын толуктасам дейм. Азыр көпчүлүк жаш муундар милиционер, депутат, ишкер болгусу келет, мен болсо жөн гана бактылуу адам болсом дейм», - дейт Бекзат.

Атама

Мен жалгызмын үй-бүлөм болуп туруп,
Мен жансызмын кара күчкө толуп туруп.
Жанымда таянар адамым жок,
Мен жансызмын жүрөгүм согуп туруп.

Эрдик кылсам кимге барып мактанам,
Күнөө кылсам кимге барып актанам?
Жанымда адамым жок таянган,
Бирөө тийсе кимге барып даттанам?

Жүргөн кезим каш-кабагым ачылбай,
Жүргөн кезим эч бир жанга чачылбай.
Келчи ата бир мүнөткө суранып,
Сүйлөйт элем эч тажабай, басылбай.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×