Бөлүмдөр
Ишемби, 14-декабрь
Ысык-Көл облусуТүп району 28.11.2019 16:23 На русском

Ысык-Көлдө жол кырсыкка кабылган унаадагы төрт адам аман калды. Сүрөт

Turmush -  Түп районундагы жол кырсыктан бир адам жабыркады, деп билдиришти күбөлөр. Алардын айтымында, кырсык 27-ноябрда түштөн кийин Түп районунун Талды-Суу айылында катталган.

«Жолдо "Ауди" унаасы жогорку ылдамдыкта бара жатып, "Фольксваген Пассат" үлгүсүндөгү унаа менен кагышты. Анын кесепетинен "Фольксваген Пассат" унаасы айыл өкмөттүн кеӊсесинин жанындагы аялдаманы сүзүп, үстүндөгү бетон унаага түшүп кетти. Анын ичиндеги 2 аял, жаш бала жана айдоочу аман калган. Аларга айыл өкмөттүн кызматкерлери жардам беришти. Дароо тез жардам кызматы чакырылды», - дешти күбөлөр.

Түп райондук аймактык ооруканасынын дарыгерлеринин айтымында, 27-ноябрда саат 16:50 чамасында ооруканага бир кыз түшкөн.

«Ошол күнү Э.Э. аттуу кыз оорукананын кабыл алуу бөлүмүнө түшкөн. Текшерүүнүн жыйынтыгы менен ал бейтаптын оӊ бутунун булчуӊу чоюлуп калганы белгилүү болгон. Ооруканада бир күн дарыланып, абалы туруктуу болгондуктан үйүнө чыгарылды», - дейт дарыгер.

Ал эми Ысык-Көл облустук жол кыймылынын коопсуздугун камсыздоо бөлүмүнөн жол кырсык тууралуу билдирүү түшкөндө инспекторлор барышканын билдиришти.

«Түп райондук ЖККК бөлүмүнүн инспекторлору жол кырсык катталган Талды-Суу айылына барышты. Бирок эки айдоочу өз ара сүйлөшүп алып, тарап кеткен. Кырсык каттоого алынып, эки айдоочунун аты-жөнү такталган. Алар Түп районунун 1990-жылы туулган тургуну Н.А. жана 1989-жылы туулган тургуну Ч.М. экени аныкталды», - деп билдиришти аталган бөлүмдөн.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×