Бөлүмдөр
Дүйшөмбү, 14-октябрь
Ысык-Көл облусуТоң району 07.10.2019 12:40

Видео — Тоңдо 2 чабанды кар көчкү басып калган кырсыктын чоо-жайы

Turmush -  Тоң районунун Сырт жайлоосунан мал айдап келе жатканда кар көчкү басып калган эки чабан куткарылды. Бул тууралуу Төрт-Күл айыл өкмөтүнүн башчысы Урмат Байсеркеев билдирди.

Анын айтымында, бөөдө кырсык 6-октябрда болгон.

«Чабандар жайлоодон 6-октябрда уй, кой, жылкы айдап, айылды көздөй чыгышкан. Орто жолдон башка жакка кеткен 2-3 уйду айдап келе жатканда кар көчкү жүрүп кеткен. Анан өз алдынча чыгышып, телефон аркылуу жардам сурашкан. Бизге бул маалымат түшөрү менен ӨКМдин Тоң райондук бөлүмүнөн куткаруучулар, райондук ооруканадан дарыгер жана айыл өкмөтүнүн өкүлдөрү жана тургундар болуп, куткаруу иштерин жүргүзүп келдик.

Көчкү астында калгандар Туура-Суу айылынын 1976-жылы туулган тургуну Мусаев Табылды жана Төрт-Күл айылынын 1973-жылы туулган тургуну Кыдырмышев Нурлан экен. Учурда алар Тоң райондук ооруканасында дарыланып жатышат», - деди Урмат Байсеркеев.

Анын айтымында, жайлоого бара турган жол начар болгондуктан кырсыктар буга чейин дагы болгон.

«Сырт жайлоосуна чейин барган жол союздан бери капиталдык оңдоодон өткөрүлгөн эмес. Буга чейин ашуудан малдар учуп каза болгон учурлар болгон. Бул жолдон Тоң, Күн-Чыгыш, Болот Мамбетов жана Төрт-Күл айыл өкмөтүнүн чабандары жайлоого барышат. Көчүүдө ар кандай кыйынчылыктарга дуушар болушат. Ошондуктан бул маселени республикалык деңгээлде чечип беришсе жакшы болмок», - деди ал.

Сырт жайлоосу райондун борборунан 60 чакырым алыстыкта жайгашкан.

Буга чейин ӨКМдин басма сөз кызматы Тоң районунун Төрт-Көл айыл аймагынын Тоң ашуусунда мал-жандыктарын айдап бара жаткан 2 чабан кырсыкка учурап, кар көчкү алдында калганын маалымдаган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×