Бөлүмдөр
Ишемби, 24-август
Ысык-Көл облусуТүп району 04.08.2019 14:30

Айыл турмушу: Түптүк К.Текеев 2 жыл мурда 2 млн сомго банкрот болгонуна карабай кайрадан ишкерликти колго алды (сүрөт)

Turmush -  Түп районунун Бирлик айылынын 44 жаштагы тургуну Кенжебек Текеев банкрот болгонуна карабай кайрадан ишкерликти колго алды. Аймактык кабарчы аны менен таанышты.

Анын айтымында, 2017-жылы 2 млн сом насыя алып, 4 гектар жерге 1 кг 500 сомдон айланган 20 тонна француз сарымсагын (чеснок) эккен. Ал жылдагы түшүм жакшы баа болбой, чыгымга учураган. Быйыл депрессиядан чыгып, бизнеске кайрадан киришти.

«Биз үй-бүлөбүз менен эл катары сарымсак өстүрүп сатууну туура көрдүк. Ал жылы 1 кг 5 сомго түшүп кетип, тонналаган сарымсакты жазга чейин кармадык. Акыры өнүп да кетти. Айла жок ыргытууга туура келди. Ошол жылдары ири суммадагы насыяны кантип төгүү керектигин ойлонуп, депрессия болуп үйдө жаттым», - деди ал.

Дыйкан бул кыйынчылыктан чыгып, быйыл кайрадан жаңы бизнес баштады. Бул жолу Бирлик айылындагы жол боюнда боз үй тигип, кымыз сатууга өттү. Кымыз ичкени келгендер үчүн тапчан да жасаган.

«Ири суммадагы насыяны баары бир төгүү керек. Бул жылы айылдын чекесинде кымыз сатууну туура көрдүм. Азыр кудайга шүгүр, Каркырадан күнүнө 300 литрден ашык кымыз алып келип сатып жатабыз. Эч кандай кошулмасы жок, өзгөчө даамданбы, айтор Казакстан, Россиядан келген туристтер куру кетишпейт», - деди ал.

Кымыз үчүн даярдалган 100 литрлик челекти күн алыс тобурчак менен ыштап, сары май менен майлап турат.

«Кымызды ийине келтирип, жагымдуу даам тартуулоого аракет кылабыз. Ага кошумча боз үй жана тапчан салып, меймандарды кабыл алып жатабыз. Эми электр жарыгы жана таза суу келсе, бардык көйгөйүбүз чечилет эле. Тейлөө шарттарын жакшыртып, тамак-аштын түрүн көбөйтмөкпүз», - деди ишкер.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×