Бөлүмдөр
Бейшемби, 18-июль
Ысык-Көл облусуЖети-Өгүз району 09.07.2019 12:35 Жаңыланды: 09.07.2019 14:20 На русском

Тагдыр: Эки кыздын энеси А.Архипова баспай калуу коркунучунда, операциясы үчүн жардам күтөт (сүрөт)

Turmush -  Жети-Өгүз районунун Кызыл-Суу айылынын тургуну Анастасия Архипова 20 жылдан ашык убакыттан бери идиопатиялык сколиоз илдети менен жабыркап келет.

Ал аймактык кабарчы менен болгон маегинде билдиргендей, 1989-жылы туулган. Жолдошу менен эки кызды тарбиялап жатышат. Жылдан жылга анын далысы ийилип, 115 градуска жеткен. Мындан улам баспай калуу коркунучу жаралууда. Ошондуктан ал кайдыгер эмес жарандардан жардам сурайт.

«Эки кызымды тең оор көтөрдүм. Экөөнү тең операция жолу менен төрөдүм. Учурда илдетим күчөп кетип, басуу оор болуп калды. Башында массаж жасатып, биздин жергиликтүү дарыгерге көрүнчүмүн. Алар операция кылуудан баш тартууда. Себеби, өтө оор болуп, баспай калуу коркунучу бар. Эгер тез арада операция кылдырбаса ички органдарды кыса баштаптыр. Учурда ички органдарга күч келип жатканын дарыгерлер айтышты», - дейт ал.

Анастасия илдетине байланыштуу 2008-жылдан баштап 3-топтогу майып. Ага карабай мектепти аяктап, жогорку билимге ээ болгон.

«Мен кесибим боюнча башталгыч класстын мугалимимин. Учурда кичүү кызым менен декреттемин. Буга чейин окуучуларга билим берип келгем. Алар менен тез тил табышып, аларды өз балдарымдай жакшы көрөм. Илдетимден тез айыгып, сүйүктүү мектебиме, окуучуларыма барсам деген тилегим бар», - дейт мугалим.

Туугандарынын айтымында, Анастасия 9-10 жашында жыгылып кеткен. Анда колу сынып дарыланган.

«Балким ошол кезде омуркаларына доо кетип, бул илдетке кабылды го деп калабыз. Ата-энеси учурда жумушу жок, жардам бере албайт. Бир тууган байкеси колдон келген жардамын берип жатат. Кайдыгер карабаган жарандар жардам берсе дейбиз. Бул илдет психикалык жактан дагы таасирин тийгизет экен. Ден соолугу барган сайын начарлап жатат. Жарандардан жардам күтөбүз», - дейт эжеси Любовь Лепехина.

Анастасия Архиповага учурда Новосибирск шаарынан операция жасатууга 500 миң рубль талап кылынат. Жардам берүүнү каалагандар 0709 773 561 номурунун электрондук капчыгына же «Дос Кредобанктын» 1212020107353225 эсебине Лепехина Любовь Анатольевнанын атына каржат которсо болот.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×