Бөлүмдөр
Бейшемби, 18-июль
Ысык-Көл облусу, Каракол 03.07.2019 13:41

Караколдогу ашлян-фу фестивалына катышкан таластык шырдакчылар. Сүрөт

Turmush -  «Нарын шаарында «Кыргыз шырдагы IX» эл аралык фестивалы аяктары менен таң эрте жолго чыгып, Караколдун 150 жылдыгына арналган «Ашлян-фу-фест» фестивалына катышканыма чексиз кубанычтамын», - деди Таластан келген Айнагүл Сыргадаева.

Анын айтымында, алардын жамаатында 6 киши иштесе, Нарынга жетекчиси Кымбат Байматова экөө барган.

«Фестивалдын жыйынтыгы менен биринчи даражадагы диплом жана акчалай сыйлыктарга татыдык. Бул жерге жете келип, кыргыздын жүзү болгон шырдак, ала кийиз жана башка кийизден жасап келген буюмдарыбызды сырттан келишкен чет элдик туристтерге сата алдык. Баарынан да ашлян-фуга абдан тойдук. Анан дагы бир ирет жейли дедик эле 3 саатка жетпей ашлян-фу калбай калганы өкүндүрдү», - деди ал.

Талас облусунун Талды-Булак айылынын 61 жаштагы тургуну, оймочу, кийизге жан киргизген уз Айнагүл Сыргадаева 5 кыз, бир уулду тарбиялап өстүргөн. Учурда 16 неберенин чоң энеси. Шырдак менен ала кийиздин түрлөрүн, столдордун үстүнө, чайнектердин астына коюлган чакан кийиз буюмдарды жана туристтер үчүн азем белектердин түрлөрүн жасап, фестивалдарда аларды сатып келет.

«Кышкысын уулум Улукбек жана келиним Бегимай болуп жаз алды менен жасала турган шырдактарга, ала кийиздерге, азем белектерге жүн тытып, даярдыктарды көрөбүз», - деди А.Сыргадаева.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×