Бөлүмдөр
Жекшемби, 20-январь
Ысык-Көл облусуЖети-Өгүз району 06.01.2019 12:45

«Жеңеке»: Жолдошуна кол салган карышкырды бычак менен өлтүргөн Элнура кыздуу болду (сүрөт)

Turmush -  Мындан эки жыл мурун, тактап айтканда 2017-жылы Жети-Өгүз районунун алыскы Ак-Шыйрак айылынын тургуну Эсенжан кызы Элнура жолдошуна кол салган карышкырды бычак менен өлтүргөн эле. Бул окуя 7-ноябрь күнү болгон. Turmush басылмасынын аймактык кабарчысы кайрадан Элнура Эсенжан кызына кайрылып, андан кабар алды.

27 жаштагы Элнура жеңе Балыкчы шаарында чоңойгон. Төрт бир тууган, өзү эгиздин түгөйү. Эгизи Элмира да турмуш куруп, өз алдынча түтүн булатып келет.

Элнура 18 жашында Жети-Өгүз районунун Барскоон айылына келин болуп келген. Үйдө улуу келин болгондуктан кайындары жаш жубайларды 10 күндөн кийин алыскы сырт өрөөнү Ак-Шыйрак айылына бөлгөн.

Кышкы ызгардуу суукта мал багууну үйрөнүп, жолдошуна көмөктөшүп келген Элнура жеңе өткөн жылы үй-бүлөсү менен айылдан сырт өрөөнүнө бара жатып кызык окуяга туш болгонун кайрадан мындайча эскерди.

"Былтыр жолдошум, улуу балам болуп айылдан азык-түлүк алып, сырт өрөөнүнө үйүбүзгө жөнөдүк. Сарычат-Ээрташ мамлекеттик коругуна тийиштүү үй жакка жеткенде биз бара жаткан авто унаа бузулуп калды. Жолдошум мени аяп, “үйгө кирип тур, мен уулум менен ондоюн” деди. Макул деп, үйгө кирип жылынып отургам. Бир маалда уулум Эрлан жүгүрүп кирип “атамды карышкыр тиштеди” деди. Чуркап эле чыктым, барсам жолдошум карышкыр менен алышып жатыптыр. Ал “жип” деди. Үйгө кирип жип алып чыктым, ага да болбоду. Анан бычак алып чыгып, жолдошума кол салып жаткан карышкырды сайдым. Чоң эле ач карышкыр экен. Жолдошум алгач ит экен деп ойлоптур, ошентип жардам бергем”, - деди ал.

Элнура жеңе: “Мен сырт өрөөнүндө жашоого көнүп калгам. Көлгө келсем кетким келет. Ал жакта таза аба, табигый тамак-аштар менен азыктанабыз. Жолдошум корукчу болуп эмгектенет”, - деди.

Жубайлардын 3 баласы бар. Жакында эле алар Айлин аттуу кыздуу болушкан.

“Жолдошум Мирбек Келгенбаев менен бирге түтүн булатканыбызга 10 жыл болду. Сыртта жашап, этекке түшүп чыкканда бир топ эле кызыктар болот. Суукта унаа бузулуп, бир канча саат жолдо калабыз. Жолдошум суукка бышырды” - дейт ал.

Элнура жеңе менен эгизи Элмира экөө тойлордо кездешип турушат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
Көп окулду
×