Бөлүмдөр
Шаршемби, 21-ноябрь
Ысык-Көл облусу, Каракол 30.05.2018 09:46

Карга буюгуп өлгөн иттер, уйлар, койлор: Ысык-Көлдө калың карда өлгөн малдын чыгымдары 20 млн сомдон ашты (фото)

Turmush -  23-майда түндө Ысык-Көл облусунда калың карда тоңуп өлгөн мал 26-28-май күндөрү беккари чуңкуруна санитардык эрежелерге ылайык көмүлдү. Бул тууралуу бүгүн, 30-майда ӨКМден билдиришти.

Маалыматка караганда, материалдык чыгымды аныктоо боюнча Жарандык коргонуу комиссиясынын отуруму өткөрүлүп, төмөндөгүдөй жыйынтык чыгарылып, актысы түзүлгөн:

Ысык-Көл району боюнча:

- кой – 2941 баш (10 587 600 сом);

- уй – 87 баш (2 610 000 сом);

- жылкы – 111 баш (4 440 000 сом)

Жалпы район боюнча келтирилген материалдык чыгым 17 637 600 сомду түзгөн.

Ак-Суу району боюнча:

- кой – 139 баш (692 000 сом);

- уй – 4 баш (80 000 сом);

- жылкы – 7 баш (295 000 сом).

Жалпы район боюнча келтирилген материалдык чыгым 1 067 000 сомду түзгөн.

Түп району боюнча:

- кой – 59 баш (236 000 сом).

Жалпы район боюнча келтирилген материалдык чыгым 236 000 сомду түзгөн.

Тоң району боюнча:

- кой – 240 баш (1 042 013 сом);

- уй –7 баш (280 000 сом);

- жылкы – 1 баш (65 000 сом).

Жалпы район боюнча келтирилген материалдык чыгым 1 387 080 сомду түзгөн.

Ысык-Көл облусу боюнча:

- кой – 3379 баш (12 557 613 сом);

- уй –98 баш (2 970 000 сом);

- жылкы – 119 баш (4 800 000 сом).

Жалпы облус боюнча келтирилген материалдык чыгым болжол менен 20 327 680 сомду түзгөн.

Окуя тууралуу:

23-майда түнкүсүн Ак-Суу районунун Шахта-Жыргалаң өрөөнүндө кар жааган.

«Кардын жаашы менен малчыларга кыйын болууда, себеби тоют эч кимде калбай калган», - дешкен жергиликтүүлөр.

Аким кандай маалымат берген?

25-майда Ысык-Көл районунда акими Данир Иманалиев калың кардын алдында 1017 кой жана 47 бодо мал калгандыгын кабарлаган.

Анын айтымында, Тору-Айгыр айыл округунда болжол менен кардын алдында 37 уй, 9 жылкы, 370 кой калган. Тамчы айыл округунда 400 баш кой, 4 уй жана 5 жылкы калды. Чоң-Сары-Ой айыл округунда 244 баш кой, 2 кулун калган. Ошондой эле, шамал 3 турак үйдүн чатырын учуруп кеткен.

«Жалпысынан калың кар алдында болжол менен 1017 кой, 42 уй жана 19 жылкы калган. Учурда өлгөн малдын саны такталууда. Биз ӨКМдин жардамы менен 3 үй-бүлөнү жайлоодон айылга алып келдик. Дагы бир үй-бүлө 600 баш койу менен жайлоодо калды, бирок жеринде атайын техника иштеп жатат. Малчылар дарыгерлердин көзөмөлүндө. Буга чейин Тору-Айгыр айылында бир малчы жоголгондугу айтылып жаткан, бирок ал аман-эсен табылды», - деди аким.

Учурда тактоо иштери дагы жүрүп жатышат.

Буга чейин 24-май күнү Ысык-Көл облусунун Ысык-Көл районунда кар калың жаагандыгына байланыштуу Сары-Камыш айылынын Эки-Чат кыштоосунда 5 чабандын баардыгы болуп 112 койу жана 1 уйу өлгөндүгү маалымдалган.

Ошондой эле, Ысык-Көл районунун Тамчы айылында сууктан иттер да өлүп калган. Малчылар жазында мындай табигый кубулуш биринчи жолу болуп жатканын белгилешти.


Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
Көп окулду
×