Бөлүмдөр
Ишемби, 20-октябрь
Ысык-Көл облусуЫсык-Көл району 09.01.2018 09:44 Жаңыланды: 09.01.2018 11:56 На русском

Бостеридеги ири өрт: 3 кабаттуу мейманкананын ээси чыгымды 50 миң долларга баалады (видео)

Turmush -  Ысык-Көл районунун Бостери айылындагы «Осьминог» ресторанынан чыккан өрттөн жабыркаган мейманканалардын биринин ээси келтирилген чыгымды 50 миң долларга баалап жатат.

«Гринхаус» мейманканасынын ээси Кайрат Тажиканов өрттүн кесепетинен конок үйүнүн 3-кабатындагы 4 бөлмө жарым сааттын ичинде күйүп кеткенин билдирди.

«Кышында электрдик жабдыктар өчүрүлөт. Биз ресторанга атайлап өрт коюлушу мүмкүн деп божомолдоп жатабыз. Электр зымдары биригиши мүмкүн эмес болчу», - деди ал.

«Осьминог» ресторанындагы өрттү өрт өчүрүүчүлөр 4 саатка жакын убакытта өчүрүшкөн.

Буга чейин Turmush басылмасы Ысык-Көл районунун Бостери айылындагы «Осьминог» рестораны толугу менен өрттөнүп кеткенин маалымдаган.

Күбөлөрдүн айтымында, саат 04:30 чамасында жарылуу угулган.

Райондук ички иштер башкармалыгы 7-январда нөөмөт бөлүмүнө Бостери айылынын Борбор конушундагы «Осьминог» ресторанынан өрт чыккандыгы тууралуу маалымат түшкөнүн билдирди. Окуя болгон жерге Ысык-Көл РИИБдин ыкчам иликтөө тобу жана Бостери айылынын милиция бөлүмүнүн кызматкерлери барган. Көңүл ачуучу жай Аламүдүн районунун Лебединовка айылынын 1988-жылы туулган тургуну А.Инаятка таандык.

ӨКМдин басма сөз кызматы кечээ, 8-январда билдиргендей, өрттү өчүрүүгө 3 өрт өчүрүү бөлүм тартылды. Өрт саат 06:50дө чектөөгө алынып, саат 10:48де толук өчүрүлдү. Анын кесепетинен «Осьминог» ресторанынын имараты толугу менен күйүп кетти.

Өрт жанындагы мейманканаларга жайылган.

- 3 кабаттуу «Гринхаус» конок үйүнүн (жалпы аянты 1500 чарчы метр) 750 чарчы метр аянты өрткө дуушар болуп, 9 желим терезе, 8 диван, 8 эшик, 8 даана керебет, палас жана башкалар күйгөн. Конок үйү Бостери айылынын 1969-жылы туулган тургуну Т.Кайратка таандык;

- 2 кабаттуу «Саябан» мейманканасынын 90 чарчы метр чатыры, 6 даана желим терезе, 6 эшик, муздаткыч, сыналгы, шкаф, 2 даана керебет жана башкалар күйгөн. Мейманкана Бостери айылынын 1969-жылы туулган тургуну У.Эрнатка таандык.

Адамдар жаракат алган жок. Учурда жалпы чыгымдын суммасы эсептелип жатат, соттук, өрт-техникалык экспертиза дайындалды.

2012-жылы Limon.kg басылмасы Бостери айылындагы «Осьминог» лаунж-барынын долбоорунун автору Саламат Үсөналиев экенин жазган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
×