Бөлүмдөр
Шаршемби, 24-январь
68.7    84.07    1.22    KZT 0.21
Ысык-Көл

Романтикалуу саякат: Цирк кызматкери Эрлан менен Индира бал айын Эстония жана Латвияда өткөрүштү

Turmush -  26 жаштагы Индира Муслим кызы Балыкчы шаарында төрөлүп, ушул шаарда чоңойгон. Ал мындан бир жыл мурун Ысык-Көл облусунун Жети-Өгүз районуна караштуу Саруу айылына келин болуп барды. Анын жолдошу учурда цирк кызматкери болуп эмгектенет.

Жакында эле жубайлар бал айын Европанын Эстония жана Латвия мамлекеттеринин бир топ шаарларында өткөрүп келишти. Эбегейсиз эргүү коштогон жубайлардын саякаты тууралуу Индира өзү аймактык кабарчыга айтып берди.

- Жолдошум Эрлан менен 2-курста таанышкам. Андан бери билинбей жашыбызга дагы жети жаш кошулуптур. Мен анда он тогуз жашта болсом, жолдошум жыйырмада эле. Алгач экөөбүз ынак достордон болуп жүрдүк. Эрлан анда цирк кызматкери болгондуктан чет мамлекеттерде көп жүрдү. Мындан улам экөөбүз социалдык түйүндөр аркылуу сүйлөшүп, уюлдук телефондун өпкө-боорун эзип, эртеден кечке чейин кат жазышып отурчубуз. Кийин достук мамиледен соң чогуу жүрмөйгө өттүк. Ал чет өлкөдөн келгенде жашыл жалбырактан көйнөк кийген бактардын далдаасында жанаша туруп алып, далай сырдаштык... Ошентип бир топ жыл кыз-жигит болуп сүйлөшкөндөн кийин ал мага үй-бүлө куруу сунушун киргизди.

Мындан бир жыл мурун Эрлан экөөбүз баш кошуп, бал айыбызды анын жумушунун алкагында Европанын Эстония жана Латвия мамлекеттеринин бир топ шаарларында өткөрүп келдик. Албетте, европалыктардан көп нерсени үйрөнүш керек экен. Бул мамлекеттердин экономикасы, элдин жашоо шарты, мекенине жасаган мамилеси, карапайымдыгы, жөнөкөйлүүлүгү, меймандостугу, айтор баары мактоого татыктуу. Туристтерди өзүнө тарта турган тарыхый эстеликтерди, сепилдерди, чептерди, урандыларды, маданий жайларды аярлап, тазалыкка катуу көңүл бурушкан эстониялыктар менен латвиялыктар туура эс алууну, убакытты туура пайдаланууну мыкты өздөштүрүшүптүр.

Туристтерге түзүлгөн шарттар, чоң-чоң имараттар, жоогазындай жайнаган 4 жана 5 жылдыздуу мейманканалар, персоналдардын көрсөткөн кызматтары жүрөгүңдү жылытып, таң калтырып, дегеле бул өлкөгө болгон саякат акылыңды тунартып, көкүрөгүңдү тазартат экен. Чыныгы жашоонун даамын татып, көр турмушту, бардык негативдүү ойлорду унутат экенсиң. Европалыктар өздөрү дагы туристтерден кем калышпай табиятка барып эс алып, музейлерди кыдырып, театрга кирип, маданият жана адабият менен азыктанган калк экен.

Алгач биз Латвияга сапар алып, Лудза, Резекне, Краслава, Даугавпилс, Екабпилс, Айзраукле, Талси, Вентспилс, Лиепая, Адажи, Балви шаарларын жана өлкөнүн борбору Риганы кыдырдык. Биз барган шаарларда ар дайым булут каптап, жаан жаап турат экен. Абасы таза, жаратылышы кооз келген Латвияда автотранспорттук каражаттар дээрлик жокко эсе. Болсо дагы аябай эле аз. Жергиликтүү тургундардын көпчүлүгү шайтан араба менен жүрүшөт. Ал үчүн атайын курстук окуу жайларда билим алып, шайтан араба башкарууга күбөлүк алышат. Көчөлөрдө бир дагы биздикиндей патрулдук милиция кызматкерлерин көрбөйсүң. Жол эрежелерин ыйык тутунган латвиялыктар кокус унаасын катуу айдап же туура эмес жерге токтотуп койсо, айдоочу дароо тиешелүү жерге барып, жол эрежесин бузгандыгына жараша айып пул төлөйт. Шаарлардын ар бир көчөлөрүнө видеокөзөмөл орнотулган. Эгер жол эрежесин бузган айдоочу айып пул төлөбөй жүрө берсе, анда видеокөзөмөл аркылуу эле ага тез арада чара колдонулат экен. Кыргызстандай кичинекей тыйын берип, кутулуп кетейин деген жат көрүнүштөр таптакыр жок.

Бир күнү жолдошум экөөбүз шаар кыдырып, жолдон өтүү үчүн жол чырактын белгисин күтүп калдык. Бир маалда өрдөк кичинекей жөжөлөрү менен кайдан-жайдан пайда болуп, жаныбызга тизилип туруп калды. Жолдун кызыл белгиси күйгөн кезде жөө жүргүнчүлөр өтүүчү жолдон жөжөлөрүн ээрчитип өтсө, Эрлан экөөбүз шок болуп эле туруп калдык. Жада калса алардын канааттуулары дагы жол эрежесин бекем сакташат экен. Аларды жалдырып карап жатып, видеотасмага дагы түшүрүп албаптырбыз (күлүп).

Мени аталган мамлекеттин саламаттыкты сактоо тармагы да аябай таң калтырды. Бир жолу жолдошум экөөбүздүн башыбыз ооруп, дарыканага кирдик. Анда иштеген фельдшерден баш оорунун дарысын сурасак, дарыгердин маалымдамасын талап кылды. Башында түшүнбөй туруп калсак, ал биздин дарыгерге барып көрүнүүбүздү жана андан атайын маалымдама кат алып келүүбүз керектигин айтты. Бул көрүнүш биринчиден биз үчүн күлкүлүүдөй, экинчиден аябай таң калычтуудай көрүндү. Ошентип Эрлан экөөбүз «башыбыз ооруп жатат» деп дарыгерге барып көрүндүк. Медициналык кароодон кийин ал бизге баш оорунун дарысын жазып берди. Дарыканага кайра кирип, дарыгердин жазып бергенин фельдшерге көрсөтүп, «баш оорунун дарысынан эки даана алам» десем «дарыгер берген маалымдамада бир гана даана дары турат» деп, экинчисин бербей койду.

Латвиянын биз барган шаарларында алкоголдук ичимдиктер кечки саат 21:00дөн кийин таптакыр сатылбайт экен. Бир күнү жолдошумдун достору жеңил алкоголдук ичимдик алабыз деп, дүкөнгө кечки саат 20:45 чамасында кирип калышты. Ошол учурда майда-чүйдө алуу үчүн Эрлан экөөбүз дагы киргенбиз. Дүкөндөн алчубузду алып, кассага саат 20:49да бардык. Кассадагы кыздар биринчи берген тамак-аштарды эсептегиче саат 21:00 болуп кетти. Ал эми, жолдошумдун достору алган алкоголдук ичимдиктердин акчасын албай кайра артка кайтарышты.

Андан кийинки саякатыбыз Эстонияда уланды. Албетте бул мамлекет дагы Латвиядай өнүккөн өлкө экен. Элинин эмгекчилдиги, убаданы бекем сактагандыгы, сырттан келген туристтерди сыйлангандыгы, өз убагында иштеп, өз убагында эс алганды билгендиги абдан жакты. Ошондой эле, алар өздөрү үчүн жашап, жылтырак-жултуракка умтулбай, бийлик, кызматка жутунбай, позитив менен жашаганы мага өзгөчө таасир калтырды.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 2984
Комментарии
Обсуждения закрыты
Көп окулду
Учурда окулуп жатат
9:36,   24.01.2018   ( 43 адам окуп жатат)
×